ភ្នំពេញ ៖ រដ្ឋបាលរាជធានីភ្នំពេញបានសម្រេចបន្តផ្អាកអាជីវកម្មដែលមានហានិភ័យខ្ពស់មួយចំនួនសម្រាប់រយៈពេល ២សប្តាហ៍ទៀត។ ការពន្យារពេលនេះមានរយ:ពេលរហូតដល់ថ្ងៃទី១៦ ខែមិថុនា ឆ្នាំ២០២១។ ដែលសេចក្តីសម្រេចនេះត្រូវបានធ្វើឡើងកាលពីយប់មិញ។

អាជីវកម្មដែលរងផលប៉ះពាល់គឺជាអាជីវកម្មដែលមិនទាន់ត្រូវបានអនុញ្ញាតឱ្យបើកដំណើរការឡើងវិញចាប់តាំងពីការដាក់ចេញនូវច្បាប់ស្តីពីវិធានការបង្ការជំងឺ កូវីដ-១៩ បានចូលជាធរមាននៅក្នុងខែមេសា។ អាជីវកម្មទាំងនោះរួមមានដូចជាសាលារៀន រួមទាំងសាលាបណ្តុះបណ្តាលវិជ្ជាជីវៈទាំងរដ្ឋ និងឯកជន លើកលែងតែសាលារៀនដែលធ្វើការបណ្តុះបណ្តាលតាមប្រព័ន្ធអនឡាញ អាជីវកម្មក្លឹបកម្សាន្តគ្រប់ប្រភេទ ជាអាទិ៍ ខារ៉ាអូខេ រមណីយដ្ឋាន សារមន្ទីរ និងសួនកម្សាន្តនានា អាជីវកម្មម៉ាស្សា រង្គសាល ឌីស្កូតែក បៀហ្គាឌិន និងកាស៊ីណូ រោងភាពយន្ត រោងសម្តែងសិល្បៈ ក្លឹបហាត់ប្រាណ និងមជ្ឈមណ្ឌលកីឡា។

ការលក់គ្រឿងស្រវឹងនៅអាចបន្តបាន ហើយការទទួលទានអាហារនៅតាមភោជនីយដ្ឋានក៏ត្រូវបានអនុញ្ញាតិដដែល ប៉ុន្តែមិនមានបម្រាមគោចរហាមឃាត់ទៀតទេ។ ការប្រមូលផ្តុំនៅតែត្រូវបានអនុញ្ញាត ប៉ុន្តែសម្រាប់មនុស្សមិនឱ្យលើសពី ១៥នាក់ទេ។ ការប្រមូលផ្តុំទាំងនោះក៏ត្រូវគោរពតាមវិធានការណ៍ការពារជំងឺកូវីដ-១៩របស់ក្រសួងសុខាភិបាលផងដែររួមមាន ការស្កេន QR code ការរក្សាម្លាត ការវាស់កម្ដៅ ការធ្វើអនាម័យដៃ និងការពាក់ម៉ាស។

ការសម្រេចផ្អាកអាជីវកម្មបណ្តោះអាសន្នដែលមានហានិភ័យខ្ពស់នៃការរីករាលដាលកូវីដ-១៩ កើតឡើងចំពេលដែលកំពុងមានការកើនឡើងនៃចំនួនករណីកូវីដ-១៩នៅក្នុងទីក្រុងភ្នំពេញ និងនៅទូទាំងប្រទេស។ ទើបតែម្សិលមិញនេះ មានករណីថ្មីសរុប ៧៥០ករណីត្រូវបានរាយការណ៍នៅទូទាំងប្រទេសរួមជាមួយការស្លាប់ ១០នាក់។ ចំនួននេះគឺជាចំនួនអ្នកស្លាប់ប្រចាំថ្ងៃខ្ពស់បំផុតចាប់តាំងពី “ព្រឹត្តិការណ៍សហគមន៍ ២០ កុម្ភៈ” ដែលមុនព្រឹត្តិការណ៍នេះមិនមានសេចក្តីរាយការណ៍អំពីការស្លាប់ដោយសារវីរ៉ុសកូវីដ-១៩ នៅក្នុងប្រទេសកម្ពុជាឡើយ។

រដ្ឋបាលរាជធានីភ្នំពេញក៏បានព្រមានផងដែរថាប្រសិនបើករណីនានាមិនចាប់ផ្តើមថយចុះនោះទេ នោះនឹងមានការពិចារណាផ្អាកសកម្មភាពអាជីវកម្មផ្សេងៗទៀត។ ចំណែកបំរាមគោចរផ្សេងទៀតក៏មិនត្រូវបានគេបដិសេធដែរ៕